O Consorcio de Santiago lembra que este venres 29 de maio remata o prazo para solicitar as axudas do programa “Ter é Manter”, dirixidas á rehabilitación e mantemento de inmobles situados na Cidade Histórica compostelá, dentro do ámbito do PE-1. Esta edición conta cun orzamento total de 700.000 euros.

O programa está destinado a inmobles de uso residencial e a inmobles de uso comercial das clases I e III, co obxectivo de fomentar a conservación do patrimonio arquitectónico, mellorar a eficiencia enerxética e garantir a accesibilidade dos edificios.

As actuacións subvencionables inclúen en concreto a restauración ou substitución das carpinterías exteriores de madeira, como galerías, ventás e portas, e a restauración de reixas, así como traballos de mantemento e mellora da envolvente exterior dos edificios, incluíndo fachadas, cubertas e patios. Tamén se contemplan intervencións para a consolidación de estruturas tradicionais de madeira e actuacións de mellora da accesibilidade para persoas con mobilidade reducida.

Así mesmo, a convocatoria inclúe o financiamento de honorarios técnicos, como a redacción de proxectos, a dirección de obra, a elaboración do informe de avaliación do edificio (IAE) e a redacción do Plan de Mantemento.

En canto ás contías, as axudas cubrirán entre o 30% e o 60% do orzamento subvencionable no caso de persoas físicas; un 30% para persoas xurídicas; un 40% para comunidades de propietarios; e un 30% para vivendas destinadas ao alugueiro.

As solicitudes poden realizarse a través da sede electrónica do Consorcio de Santiago, así como de maneira presencial no rexistro do organismo (Rúa do Vilar, 59).

Con esta nova convocatoria, o Consorcio de Santiago reforza o seu compromiso coa conservación e posta en valor do patrimonio da Cidade Histórica, ao tempo que impulsa a mellora da calidade de vida das persoas residentes.